طريقه عمل السمنه البلدي في البيت
طريقه تجميع القشطه لعمل السمنه البلدي
السلام عليكم ورحمة الله وبركاته ازيكم حبايبي منورين صفحتي المتواضعه وإن شاء الله تستفيدو من وصفاتي ويارب تعجبكم وهنبتدي بسم الله ف اول وصفاتي طريقة عمل السمنه البلدي من قشطة اللبن
طبعا بنجيب لبن سايب بس لبن يكون من حد مضمون وكل ما تغلي اللبن تسيبيه يبرد وتحفظيه ف التلاجه عشان يعمل وش لبن اللي هي القشطه وتحوشيها ف علبه ف الفريزر وكل ما تغلي لبن تحطي القشطه ع بعضها وف الفريزر وهكذا لحد ما تحوشي شويه حلوين علبه او علبتين ووقت ما تيجي تعملي السمنه
اسهل طريقه لعمل السمن البلدي
اسهل طريقه ومتتعبكيش تطلعي القشطه من الفريزر وتسبيها تفك شويه يدوب انها تخرج من العلبه وتفضيها ف الحله اللي هتعملي فيها وتشغلي النار عليها هتلاقيها ساحت خالص وهتعمل معاكي رغاوي بيضه خليها تغلي شويه وطبعا مع التقليب ولما تسيح خالص حطي شوية ملح وهدي النار عليها خالص مع المتابعه ليها والتقليب المستمر لحد ما تلاقيها فصلت المورته لوحدها والسمنه لوحدها وعشان تعرفي انها استوت لون المورته يكون دهبي غامق شويه بكده بتكون استوت
وممكن تضيفي عليها كيلو سمنه كريستال او روابي لو حابه تزودي الكميه وتسيحيهم مع بعض وبعد ما تسيح تطفي عليها وتهدي شويه مش تبرد خالص عشان تعرفي تصفيها من المورته وبعد ما تصفيها احفظيها ف برطمان ازاز افضل ولو هتحفظيها ف الصيف يبقي الافضل ف التلاجه ولو ف الشتا خارج التلاجه عادي وبالنسبه للمورته لو محتاجه ملح بعد ما تصفيها حطيها ف الحله تاني وحطي عليها ملح وقلبيها شويه ع النار تشرب الملح وتطفي عليها وبالف هنا ع قلوبكم ويارب تكون الوصفه عجبتكم وتكونوا استفدوا ودي بعض الصور بعد ما عملت السمنه البلدي